文:Marcus
細細個睇電視見到兒童節目同劇集嘅小演員，你有冇諗過自己都去應徵下，發揮下你嘅表演慾，不過通常都得個講字，下面呢16位就唔同，你未必記得佢個名，但肯肯定你哋係睇佢哋嘅戲大，其實父母帶啲童星拍下劇玩下咪好囉，使乜影寫真賺錢呢？好等錢開飯？
1.成展權88年出生，曾參與《十月初五的月光》、《帝女花》等劇，不過最出名當然係佢用真名拍咗好多教育電視節目，全香港中小學生都識佢，而家佢好似喺城大讀緊學士課程！
2.成珈瑩 93年出生，，佢係成展權妹妹，因為成日去睇哥哥拍劇，所以就自薦又被工作人員睇中就入咗行。曾參與《陀槍師姐III》、《天幕下的戀人》等劇同多個廣告，最為人熟讀就係喺《烈火雄心II》中飾演王喜個女紀瑤，可愛到不得了。
3.張裕東
88年出生，《閃電傳真機》同《至NET小人類》鐵腳，日日見都到佢，人稱東東大師，08年起返咗TVB做配音，都敏俊、《反斗奇兵3》嘅安仔都係佢配㗎，好叻仔！
4.張國權89年出生，唔使講佢最出名當然係喺《我和殭屍有個約會》中飾演尹天照個仔況復生，幾年前報導指佢成功求婚，而家應該已經成家立室。
5.李日昇92年出生，佢由細拍劇拍到大，年資分分鐘長過好多藝員，為人熟悉嘅角色可能係《 家好月圓 》裡面做少年管家仔(林峰細個)，另外佢仲拍過《黑社會》、《男兒本色》等電影，同劉華、任達華、梁家輝合作過。
6.丁力88年出生，7歲開始拍劇，最出名就係做《真情》入面蔣志光個仔同埋《陀槍師姐》入面嘅樂樂，不過大個咗就冇拍喇，去咗外國讀書。嗱，佢冇拍過《上海灘》㗎！
7.黃美棋89年出生，美棋BB唔使我多講啦，自從幾年前大學畢業後，從美國回流重出江湖後，幫HKTV拍咗多部劇集，而佢細個嘅代表作應該係《 行運一條龍》入面飾演小芬女，咁多年嚟個樣都冇變。
8.陳景昆93年出生，外號昆少，畀星探發掘入行，曾參與《男親女愛》、《智勇新警界》等劇。
9.吳諾弘99年出生，曾參與《酒店風雲》、《談情說案》、《巨輪》等劇，外號菠蘿仔嘅佢而家讀緊中學，仲會代表香港隊出戰劍擊比賽。
10.王秉熹(Jeffrey)、王樹熹(Jacky仔)兄弟Jeffrey 95年出生，曾參與《皆大歡喜》、《大冬瓜》等劇；細佬Jacky仔98年出生，曾參與《甜孫爺爺》、《師奶兵團》等劇，兩個都好醒目，專演人細鬼大嘅角色，不過近年就少咗出鏡。
11.莫凱謙98年出生，05年參加《殘酷一叮》，連續成為三屆台主，因為招招積積而受歡迎入行，人稱「莫生」，曾參與《讀心神探》、《阿旺新傳 》等劇，而家都冇放棄表演，經常參加歌唱比賽。
12.丘梓宏、丘梓謙兄弟梓宏又名丘竣霆，92年出生，花名四少，曾參與《心花放》、《酒店風雲》等劇，佢而家做咗歌手，有派台歌㗎；細佬梓謙94年出生，曾參與《老婆大人》、《學警雄心》等劇，兩兄弟而家成日拍住上出Event。
13.楊家盛 96年出生，《居家兵團》、《天與地》等劇，大個咗無晒啲扭計樣同Baby Fat，一定追晒啲女仔啦！
14.張裕里 裕里而家幾多歲小編都搵唔到，不過就一定好大個仔，有玩舞台劇，佢以前曾參與《律政新人王》、《無頭東宮》等劇，最出色當然係做《封神榜》嘅童年哪吒。
15.薛立賢94年出生，曾參與《烈火雄心II》，仲拍過好多電影，包括《一路向西》，最出名就係於《童夢奇緣》做童年劉德華，大個咗兩個字，靚仔！
16.譚真一03年出生，4歲開始演藝生涯，曾參與《師奶股神》、《富貴門》等劇，深得家燕媽媽寵愛，一哥最令人深刻印象嘅演出一定係電影《殺人犯》，小編腦海即刻彈起佢嗰句「我又想跟你老婆睡啦」！
差啲唔記得呢位童星，咁多年都長唔大！
