業主唔可以裝設火爐或使用產生煙霧嘅燃料 網民熱議：係咪即係唔可以喺私人平台燒嘢食？
秋高氣爽天氣轉涼，好多屋企有天台或者平台嘅人，都諗緊喺屋企搞吓BBQ，不過原來唔少屋苑住客BBQ，都有嚴格規定。有網民喺香港討論區發帖，話所住屋苑嘅公契指明：「任何業主不得裝設任何火爐、鍋爐或其他機組或器材，或在屋邨任何部份使用在任何情況下會產生煙霧之任何燃料」，樓主問網民：「請問咁寫係咪理解成唔可以喺自己私人平台燒野（嘢）食？」，大家點睇呢？
網民普遍覺得，如果用電爐，應該無違規：「佢針對燃料，咁……電烤爐，得唔得？」、「意思係該燃料不能產生煙霧，例如一般的燒烤碳係唔得（除非有真正的無煙碳），gas 爐/電爐燒，係可以的！」，對於要做到「無煙」，樓主考慮到好仔細嘅問題：「油脂滴落無煙碳也能做到無煙嗎？」，網民就覺得用gas爐好啲：「我估唔得，所以我都係用gas爐加韓式板：再去donki買和牛都ok 架（㗎）！」，但樓主好敏感：「gas也是燃料，話到在任何情況下……即係gas爐睇黎（嚟）都唔得！」，但網民就覺得樓主諗多咗：「應該唔係所有燃料都唔得，否則就唔會寫『煙霧』兩個字！」，
樓主所居住嘅屋苑住客公契指明：「任何業主不得裝設任何火爐、鍋爐或其他機組或器材，或在屋邨任何部份使用在任何情況下會產生煙霧之任何燃料」，咁究竟係咪可以喺屋企平台BBQ呢？
網民覺得用gas爐或者電爐，應該無乜嘢「煙霧」，可以符合屋苑要求。
公契一句滋擾鄰居已通殺 其實用乜嘢爐都無用
不過似乎樓主真正擔心嘅地方，並唔係用乜嘢爐，而係鄰里關係：「但我就咁睇……呢段野（嘢）主體係煙霧，而公契條文目的係為左（咗）防止住戶滋擾到鄰居，因為煙霧會對其他人產生滋擾，塊肉燒煎烤點都會有煙霧產生出黎（嚟）……我覺得目的係禁止用一切果啲咩咩裝置去整野（嘢）食，同意嘛？」、「咩爐都冇用，公契一句滋擾鄰居已通殺，正如露台食煙會俾人投訴+公審」，有網民覺得如果喺室內燒，其實係OK嘅：「應該係指燃料的煙霧，唔係食物的煙霧，咁好難避免，一般係天台就影響細D，露臺就影響大D，我通常都係開油煙機加抽氣扇，屋內gas爐燒，當然要搞好對流空氣，同埋關房門，咁就唔會一屋味」，但樓主都仲係覺得放喺自己屋企，做法係行唔通：「你咬文嚼字一定可以講得過，點gas係唔會有煙霧……唔係天台戶，而係屋企有個大平台，啲燒食物既（嘅）煙燻到鄰居……所以我仲提出埋鄰居話受到滋擾就係通殺，你喺屋內燒就要讚啦，啲味經抽煙機排出去天井，但室外燒就一定周圍散。」
但樓主其實覺得最大問題，並唔係用乜嘢爐，而係喺屋企BBQ，係會滋擾到鄰居。
有網民提議可以喺室內用電爐或gas爐燒，開油煙機加抽氣扇，搞好室內對流空氣，其實未必影響到鄰居。
text/Joyce
photo/HKET圖片庫
============
同場加映：
【蝸居睇樓團】大角咀粉紅日系新婚愛巢 房中房和紙趟門夠慳位、中島開放式廚房
港生活人氣本地熱話
【請您睇戲】投選您心目中的金像獎影帝影后🫅🏻👸🏻
↓立即投票贏禮物！↓
【請您去】iSQUARE國際廣場「爆」趣童玩之旅💥
↓ Striking爆炸糖Strikids(爆炸仔)小隊✨ + 本地懷舊玩意元素🙌 ↓
